समुदाय संसाधन कर्मचाऱ्यांचे सतरा महिन्याचे मानधन द्या

आमदार प्रतिभाताई धानोरकर यांची ग्रामविकास मंत्री हसन मुश्रीफ यांच्याकडे मागणी

चंद्रपूर : महाराष्ट्र राज्य ग्रामीण जीवनोन्नती अभियान तथा उमेद अभियानाच्या अंमलबजावणीमध्ये समुदाय संसाधन व्यक्तींची महत्त्वपूर्ण भूमिका असून समुदायस्तरीय संस्थांच्या माध्यमातून त्यांच्या सेवा यापुढेही समुदायास उपलब्ध होत असतात. ग्रामसंघ व प्रभागसंघांना शासनाकडून अभियानामार्फत निधी उपलब्ध होत नसल्यामुळे समुदाय संसाधन व्यक्तींचे मानधन सतरा महिन्यापासून प्रलंबित असलेले मानधन तात्काळ देण्याची लोकहितकारी मागणी आमदार प्रतिभाताई धानोरकर यांनी ग्रामविकास मंत्री हसन मुश्रीफ यांच्याकडे केली आहे.

अभियानाच्या प्रभावी अंमलबजावणीसाठी समुदायस्तरीय संस्था जसे की ग्रामसंघ व प्रभागसंघ यांच्यामार्फत समूह संसाधन व्यक्तींची (सीआरपी) नेमणूक मानधन तत्वावर संस्थामार्फत करण्यात आलेली आहे. गरिबांना गरिबीतून बाहेर पडण्यासाठी त्यांना पोषक वातावरणाची आवश्यकता असते हे सूत्र लक्षात घेऊन अभियान सुरु झाल्यापासून मागील आठ वर्षात तयार करण्यात आलेले स्वयंसहाय्यता गटांना प्रशिक्षण देऊन व आर्थिक सहाय्य करुन त्यांच्या व्यवसायाच्या प्रगतीसाठी अभियानांतर्गत सातत्याने काम करण्यात येत आहे. अभियानांतर्गत तयार झालेले स्वयंसहाय्यता गटातील महिला अभियानाच्या माध्यमातून स्वयंपूर्ण होत असून त्यांच्याकडे उपजीविकेचे स्त्रोत निर्माण करण्यात येत आहेत परंतु गाव स्तरावर कार्यरत समूह संसाधन कर्मचाऱ्याचे मानधन मागील सतरा महिन्यापासून मिळाले नसल्यामुळे त्यांच्या उपजीविकेचा प्रश्न निर्माण झाला आहे.

त्यामुळे प्रलंबित असलेले मानधन तात्काळ देण्याची लोकहितकारी मागणी आमदार प्रतिभाताई धानोरकर यांनी ग्रामविकास मंत्री हसन मुश्रीफ यांच्याकडे केली आहे.