पोलिसांना टिप मिळाली; जंगलात पोहोचताच नक्षल्यांनी सुरु केला बेछूट गोळीबार

गडचिरोली : धानोरा तालुक्यातील सावरगाव पोलीस मदत केंद्र अंतर्गत येणाऱ्या मोरचुल जंगल परिसरात नक्षलविरोधी अभियान राबवीत असताना पोलीसांमध्ये व नक्षल्यांमध्ये चकमक उडाली यात दोन नक्षलीना कंठस्नान घालण्यात गडचिरोली पोलीस दलास यश आले आहे.

प्राप्त माहितीनुसार, सावरगाव पोलीस मदत केंद्र अंतर्गत येणाऱ्या मोरचूल जंगल परिसरात नक्षलवादी असल्याची माहिती गडचिरोली पोलीस दलास प्राप्त झाली. मिळालेल्या माहितीच्या आधारे आज सकाळच्या सुमारास सदर जंगल परिसरात नक्षलविरोधी अभियान राबविण्यात आले असता दबा धरून बसलेल्या नक्षल्यांनी पोलिसांच्या दिशेने बेछूट गोळीबार केला. यावेळी पोलिसांनी सुद्धा प्रत्युत्तरदाखल नक्षल्यांच्या दिशेने गोळीबार केला.

जवळपास तासभर चकमक उडाली व पोलिसांचा वाढता दबाव पाहून नक्षल्यांनी जंगलाचा फायदा घेत पसार झाले. दरम्यान पोलीस जवानांनी सदर परिसरात शोधमोहीम राबविली असता दोन नक्षली ठार झाल्याचे निदर्शनास आले असून घटनास्थळी मोठ्या प्रमाणात रक्ताचा सडा आढळून आला. जखमी आणि मृतकांची संख्या जास्त असल्याची शक्यता वर्तवली जात असून अजूनही परिसरात पोलिसांकडून शोध मोहीम राबविली जात आहे.